Issue Date: 14th January 2024
- Méadú ó 35 bliain d’aois go 50 bliain d’aois ar an teorainn aoise le hiarratas a dhéanamh chun bheith ina Gharda faoi oiliúint
- Iarrann Coimisinéir an Gharda Síochána ar dhaoine ó gach cúlra agus pobal iarratas a dhéanamh chun a bheith ina Gharda
- Tá an Garda Síochána ag mealladh iarrthóirí atá ag obair i seirbhísí póilíneachta thar lear agus ó ghairmeacha eile (féach teistiméireachtaí thíos)
Osclaíodh comórtas earcaíochta na nGardaí is déanaí inniu (15ú Eanáir 2024) agus beidh sé ar siúl go dtí 15.00 ar an 8ú Feabhra 2024.
Is í an tSeirbhís um Cheapacháin Phoiblí a fheidhmeoidh an comórtas thar ceann an Gharda Síochána. Is féidir le hiarrthóirí iarratas a dhéanamh ag www.publicjobs.ie.
Tar éis cinneadh Rialtais, tá an teorainn aoise le hiarratas a dhéanamh chun bheith ina Gharda faoi oiliúint méadaithe ó 35 bliain d’aois go 50 bliain d’aois ón gcomórtas seo ar aghaidh.
D’fhonn sraith seasta d’oiliúnaithe an Gharda Síochána a sholáthar sna blianta atá le teacht, tá sé i gceist go mbeidh feachtais earcaíochta an Gharda Síochána á reáchtáil go bliantúil.
Dúirt an Coimisinéir Harris roimhe seo gur gá ní amháin sprioc an Rialtais de 15,000 Garda a bhaint amach, ach líon na nGardaí a mhéadú níos mó fós mar gheall ar fhás an daonra agus nádúr na coireachta atá ag athrú. Tá 13,998 Garda ann faoi láthair (ar an 31ú Nollaig 2023).
Ag labhairt inniu, dúirt an Coimisinéir Drew Harris, "Is post an-sásúil é bheith i do Gharda ach uaireanta tá sé crua. Mar Gharda déanfaidh tú fíor-difríocht i saol na ndaoine. Cuirfidh tú athruithe dearfacha i bhfeidhm i bpobail. Coinneoidh tú daoine sábháilte.
Tabharfaidh tú tacaíocht d’íospartaigh. Cuirfidh tú an dlí i bhfeidhm. Agus, tríd an obair luachmhar agus spreagúil seo, feicfidh tú go díreach an tionchar a bhíonn ag do ghníomhartha ar an bhfíorshaol. Sin an fáth gur fiú duit bheith i do Gharda.
"Gach lá, coimeádann Gardaí pobail agus daoine sábháilte trínár gcur chuige uathúil i leith póilíneachta trí thoiliú. Is é an cur chuige seo in éineacht le go leor deiseanna gairme a mheall daoine le bheith ina nGardaí. Bhí daoine a bhí ina bpóilíní i ndlínsí eile fiú tar éis filleadh chun athoiliúint a chur orthu mar Gharda.
"Tá dúshláin ag baint le póilíneacht i sochaí nua-aimseartha agus éagsúil atá ag athrú de shíor, ach ag an am céanna tugann sé deiseanna dúinn fás, foghlaim agus oiriúnú. Sin an fáth go n-aithníonn An Garda Síochána go bhfuil gá acu athrú freisin chun freastal ar riachtanais agus éilimh mhuintir na hÉireann.
"Cheana féin, tá ceann de na rátaí comhréir is airde d’oifigigh baineanna againn san Eoraip, ach tá a fhios againn go bhfuil níos mó le déanamh chun ár n-aidhm a bhaint amach chun ionadaíocht iomlán a dhéanamh ar na daoine ar a bhfreastalaímid. Sin an fáth go bhfuilimid ag súil le níos mó iarrthóirí ó chúlraí éagsúla a mhealladh mar chuid den fheachtas seo. Ba mhaith linn, agus teastaíonn uainn, daoine ó gach cúlra agus pobal a bheith mar chuid de na Gardaí.
"Méadaítear an teorainn aoise go 50 bliain d’aois freisin leis an bhfeachtas seo. Soláthraíonn sé seo daoine a d’fhéadfadh a bheith ag iarraidh a bheith ina nGardaí anois ach a shíl go raibh an deis imithe thart nó atá ag smaoineamh ar ghairm a athrú le dul isteach sa Gharda Síochána agus cur go mór leis an tsochaí go buan.
"Mar sin, má tá gairm bheatha á lorg agat i seirbhís do shaoránaigh na hÉireann, a thairgeann rud nua lá i ndiaidh lae, le deiseanna dul chun cinn gairme, agus scóip chun éagsúlú agus speisialtóireacht a dhéanamh i réimsí éagsúla póilíneachta, ba mhaith linn a chloisteáil uait.”
Chun an comórtas earcaíochta a chur chun cinn, beidh feachtas promóisin €400,000 (CBL san áireamh) faoin ainm "Is post fiúntach é” ar an teilifís, ar chló agus ar an raidió náisiúnta agus áitiúil, ar líne, ar na meáin shóisialta agus faoin aer ón 15ú Eanáir 2024. Díreoidh an feachtas freisin ar Éireannaigh a bhfuil cónaí orthu i dtíortha mar an RA, SAM, Ceanada, an Astráil agus an Nua-Shéalainn.
Ba iad Core agus Spark Foundry i gcomhar le H2 Films a léirigh na meáin agus cruthaitheacha don fheachtas fógraíochta i 2023.
I 2023, chuir 746 duine tús le hoiliúint le bheith ina nGardaí agus bhí 388 Garda deimhnithe.
Is i mí Aibreáin 2024 a bheidh an chéad ghrúpa Gardaí eile le deimhniú.
Gardaí Nua-Deimhnithe Ar an bhFáth ar Chuaigh Siad Isteach sa Gharda Síochána
"Is rud é a theastaigh uaim i gcónaí a dhéanamh. Theastaigh uaim a bheith páirteach nuair a bhí mé 18 mbliana d’aois ach ar an drochuair ní raibh aon earcaíocht ag an am sin agus mar sin bhog mé go dtí an Astráil agus chuaigh mé isteach leis na póilíní agus ansin tháinig mé ar ais ón Astráil i mí Aibreáin le haghaidh feachtas 2023.
Is é an rud a déarfainn leo siúd atá ag smaoineamh ar dhul isteach ann ná ar aghaidh leat. Is gairm dhúshlánach í, níl dhá lá ar bith mar a chéile, tá an oiread sin foghlamtha againn sa Teampall Mór chun sinn a ullmhú le haghaidh na rudaí a bhfuil le teacht, mar sin caithfidh tú a bheith athléimneach agus brú a chur ort féin agus scaoil faoi.
Garda Lorraine Delahunty ó Chontae Laoise, lonnaithe i gCathair Luimnigh
(Nasc don fhíseán https://youtu.be/-upPLQesWy4)
"Bhí mé i gcónaí ag iarraidh dul isteach sna Gardaí. Bhí mé san Arm ó 2013 agus bhraith mé go raibh go leor tréithe agam a d’fhéadfainn a thabhairt anonn, agus arís tá seans ann ardú céime a fháil. An rud a déarfainn leo siúd atá ag iarraidh páirt a ghlacadh ná is léir go bhfuil mé aibí ag teacht isteach, agus mar sin tá sé scanrúil go leor teacht isteach ag m’aois. Shíl mé go hacadúil nach mbeinn in ann é a dhéanamh, ach tá go leor tacaíochta anseo. Tá foireann an Choláiste ar fheabhas ar fad. Déarfainn bain triail as, is cinnte gur fiú é a dhéanamh”.
Jonathan O’Dowd ó Chill Mhantáin lonnaithe san RCBÁC Thoir(Nasc don fhíseán https://youtu.be/zoFk6tSmE6Q)
"Rugadh mé i Londain do thuismitheoirí Éireannacha, ach is rud é ba mhian liom i gcónaí a dhéanamh. Bhí mé i mo phóilíní sa RA agus bhí an-dúil agam i gcónaí dul isteach sna Gardaí agus cabhrú leis na daoine agus leis an bpobal i gcoitinne.
An rud a déarfainn leo siúd atá ag smaoineamh ar pháirt a ghlacadh ná, ná cuir ar an méar fhada é, tá sé indéanta chomh fada agus a chuireann tú do cheann síos agus go n-oibreoidh tú go crua. Ná smaoinigh air, agus bain triail as”.
Jamie Quinn ó Chluain Meala Co Thiobraid Árann lonnaithe i gcathair Bhaile Átha Cliath (Nasc don fhíseán https://youtu.be/Kh36INqiU3c)
"Bhí suim i gcónaí agam sna Gardaí. Ba mhúinteoir mé sula chuir mé isteach ann agus tá suim mór agam a bheith ag obair i measc an phobail agus ag cuidiú le daoine.”
Is jab doiligh agus dúshlánach é ach bímse ag foghlaim cineál gach lá.”
Fionnuala Nic Corraidh as Béal Feiriste, lonnaithe ag Gaeltacht Ráth Chairn [Translation]
"I was always interested in the Gardaí. I was a teacher before I applied and I have an interest in working among the community and helping people.
It’s a difficult and challenging job but I’m learning almost every day.”
Fionnuala Nic Corraidh from Belfast stationed at Ráth Chairn Gaeltacht.
(Nasc don fhíseán https://youtu.be/jqfA53w3vWk)
"Bhí a fhios agam gur theastaigh uaim oibriú le daoine ach ní raibh a fhios agam cén bealach. Tá céim agam i Staidéar Leanaí, Óige agus Teaghlaigh ó OÉ Gaillimh, bhain mé céim amach i 2020 agus chonaic mé an t-iarratas agus dúirt mé go ndéanfainn iarratas. Tá an-áthas orm agus ceapaim gur jab iontach a bheidh ann agus táim ag tnúth leis. Sílim gur gairm iontach a bheidh ann, tá go leor deiseanna amuigh ansin, tá spás ann do gach duine, agus molaim go cinnte é”.
Garda Aideen Gavin as Gaillimh lonnaithe i gCo. Chill Dara
(Nasc don fhíseán https://youtu.be/JodCYYWV_z8)
"Theastaigh uaim a bheith i mo Gharda mar gur oibrigh mé sa mhiondíol ar dtús agus d'fhorbair mé paisean do dhaoine, thuig mé go raibh mé ag iarraidh cabhrú le daoine níos mó. Dá mbeadh orm píosa amháin comhairle a thabhairt, breathnaigh ar do scileanna agus na tréithe atá agat agus tuig go bhfuil siad go léir bailí, beidh aon rud a thabharfaidh tú ó do chúlra don phost seo chun fónamh duit agus agus is féidir gach rud a úsáid agus a chur ar an líne thosaigh”.
Garda Manus Murphy as Baile Formaid i mBaile Átha Cliath onnaithe i gcathair Bhaile Átha Cliath anois(Nasc don fhíseán https://youtu.be/drsS97me3fc)
